...................... .................

پاکستان نے سری لنکا کو کلین سویپ کر دیا

پاکستان نے کراچی میں ہونے والے ون ڈے سیریز کے آخری میچ میں بھی سری لنکا کو ہرا کر سیریز اپنے نام کر لی۔
ایچ ٹی وی پاکستان کے مطابق پہلے میچ سے قبل ہونے والی طوفانی بارش کی وجہ سے ہیلا ون ڈے منسوخ ہونے کے بعد پاکستان نے اگلے دونوں میچ اپنے نام کر کے میدان مار لیا۔
اس موقع پر اپنے ہیروز کو ایکشن میں دیکھ کر کرکٹ شائقین کی خوشی کا ٹھکانہ نہیں رہا۔
تفصیلات کے مطابق کراچی کے نیشنل اسٹیڈیم میں کھیلے گئے میچ میں سری لنکا کے کپتان لہیرو تھریمانے نے ٹاس جیت کر پہلے بیٹنگ کا فیصلہ کیا۔
سری لنکا کی جانب سے دنوشکا گونا تھلکا اور ایوشکا فرنینڈو نے اننگز کا آغاز کیا جو مایوس کن رہا اور ابتداء میں ہی ایوشکا فرنینڈو 4 رنز بناکر پویلین لوٹ گئے۔
دنوشکا گوناتھلکا کی شاندار سنچری کی بدولت سری لنکا نے مقررہ 50 اوورز میں 9 وکٹوں کے نقصان پر 297 رنز بنائے۔
مہمان ٹیم کی جانب سے دنوشکا گوناتھلکا 133، شناکا 43، کپتان تھریمانے اور بھنوکا 36، 36 رنز بناکر نمایاں رہے۔ گرین شرٹس کی جانب محمد عامر نے 3، عثمان شنواری، وہاب ریاض، شاداب خان اور محمد نواز نے ایک ایک وکٹ حاصل کی۔
سری لنکا کے 298 رنز کے جواب میں پاکستان کی جانب سے اننگز کا آغاز فخرزمان اور عابد علی نے کیا اور ذمہ دارانہ بیٹنگ کرتے ہوئے پہلی وکٹ پر 123 رنز کی شراکت قائم کی، دونوں بلے بازوں نے نصف سنچریاں اسکور کیں۔
عابد علی 74 رنز بناکر ڈی سلوا کا شکار بنے تاہم اس کے بعد آنے والے بابر اعظم بھی 31 رنز بناکر پویلین لوٹے۔
189 کے مجموعی اسکور پر فخرزمان بھی 76 رنز بنا کر آؤٹ ہوئے جبکہ ان کے بعد حارث سہیل نے ذمہ دارانہ بیٹنگ کی اور نصف سنچری بناکر ٹیم کی جیت میں اہم کردار ادا کیا۔
گرین شرٹس نے 49 ویں اوور میں 5 وکٹوں کے نقصان پر ہدف حاصل کیا اور یوں 5 وکٹوں سے کامیابی حاصل کی، اس فتح کے ساتھ پاکستان نے 3 ایک روزہ میچز کی سیریز بھی 0-2 سے اپنے نام کرلی۔
پاکستان کی جانب سے فخرزمان 76، عابد علی 74 اور حارث سہیل 56 رنز بناکر نمایاں رہے۔ آئی لینڈرز کی جانب سے پرادیپ نے 2، کمارا، ڈی سلوا اور جے سوریا نے ایک ایک کھلاڑی کو آؤٹ کیا۔
عابد علی کو مین آف دی میچ جبکہ بابر اعظم کو مین آف دی سیریز قرار دیا گیا۔
کراچی نیشنل اسٹیڈیم میں ہونے والے ون ڈے سیریز کے اختتام کے بعد اب قوم کی نظریں لاہور کے قذافی اسٹیڈیم پر لگی ہیں جہاں 5، 7 اور 9 اکتوبر کو 3 ٹی 20 میچوں کی سیریز کھیلی جائے گی۔
یاد رہے یہ تینوں میچ پاکستانی وقت کے لحاظ سے شام 5 بجے کھیلے جائیں گے۔

جواب لکھیں